close
什麼號作『酸民』，往過老一沿的講：「講歸畚箕，做一湯匙。」，是咧刮洗彼一寡仔生喙就是欲講人，看著空課毋振動的人。
誠濟人話若是一出喙，就是正刮倒削，有喙講別人，無喙講家己。別人一點失腳差，未輸天大地大，若親像去踏破伊兜的金斗甕仔咧，欲拍欲揤。那是家己失誤，就講只是無張弛，實在是不得已，才來姑不而終。
現此時有一寡靠噴喙瀾，練痟話，佇電視頂面鄙相人，通領通告費的人，連鞭講焉爾，連鞭又講焉爾，專門看風使帆，乎真濟目睭糊到蜊仔肉的觀眾，當作是正義之聲，咱勉強當作是看戲，反正演戲的結悾結痟，看戲的就結呆結戇。伊當作咱是悾歁的，咱嘛是當作伊諞仙仔王祿仔爾爾。
但是這碼網路頂懸的『酸民』，有時陣喙瀾噴一水池，若欲湊腳手做代誌，看無伊的人就好了啊，更較惡質的，甚至去揪人的後腳。實在是嘴念阿彌陀，手夯殺牛刀。
這款人，普通時仔，專門會曉講人食菜食無清，真正人咧出腳手救人的時，擱欲聽伊講五四三的，真正是氣死驗無傷。
所以，我若是抵著這款的，攏將當作是睏無飽，起無空咬無人，叫伊緊轉去睏好飽眠就好啊！
全站熱搜
留言列表
